విద్యార్థుల ఆందోళన… అధికారుల హామీ
మంచిర్యాల జిల్లా బెల్లంపల్లిలో బీసీ వసతి గృహ విద్యార్థులు తమ సమస్యల పరిష్కారం కోసం ఆందోళన చేపట్టారు. సబ్ కలెక్టర్, తహసీల్దార్ కార్యాలయం ఎదుట బైఠాయించి నిరసన వ్యక్తం చేశారు.
బెల్లంపల్లిలోని బీసీ వసతి గృహంలో ప్రభుత్వం నిర్దేశించిన మెనూ ప్రకారం భోజనం అందించడం లేదని విద్యార్థులు ఆరోపించారు. అంతేకాకుండా, వసతి గృహ మైదానంలో ఆడుకునేందుకు కూడా అనుమతి ఇవ్వడం లేదని ఆవేదన వ్యక్తం చేశారు. వెంటనే మెనూను సక్రమంగా అమలు చేయాలని డిమాండ్ చేస్తూ పెద్దఎత్తున నినాదాలు చేశారు.
ఈ సందర్భంగా ప్రజావాణి కార్యక్రమంలో విద్యార్థి సంఘాల ప్రతినిధులతో కలిసి అధికారులు వినతి పత్రం స్వీకరించారు. విద్యార్థుల సమస్యలను పరిశీలించి, ప్రభుత్వం నిర్దేశించిన మెనూను అమలు చేయడానికి అవసరమైన చర్యలు తీసుకుంటామని హామీ ఇచ్చారు. అధికారుల హామీతో విద్యార్థులు తమ ఆందోళనను విరమించారు.