అమెరికాకు భారీ ఎదురుదెబ్బ..

ఇరాన్‌తో కొనసాగుతున్న యుద్ధ పరిస్థితుల్లో అమెరికా అనేక షాక్‌లను ఎదుర్కొంటోంది. ఒకే రోజులో రెండు అమెరికా యుద్ధ విమానాలు ఇరాన్ కూల్చింది. మ‌రో రెండు హెలికాప్టర్లపై కూడా దాడులు జరిగాయి. ఈ ఘటనల్లో ఇద్దరు పైలట్లు సురక్షితంగా బయటపడ్డారు. ఈ ఘ‌టన‌లో మరొక పైలట్ గల్లంతైనట్లు సమాచారం. శుక్రవారం అమెరికాకు చెందిన ఎఫ్‌-15ఈ స్ట్రైక్‌ ఈగల్‌ యుద్ధ విమానాన్ని ఇరాన్ కూల్చేసింది. ఈ విమానంలో ఒక పైలట్, వెపన్‌ సిస్టమ్ అధికారి ఉన్నారు. ఒకరిని రక్షించామని, మరొకరి కోసం గాలింపు కొనసాగుతోందని అమెరికా, ఇజ్రాయెల్ అధికారిక వర్గాలు వెల్లడించాయి. ఘటనల గంటల్లోనే హర్మూజ్ సమీపంలో ఏ-10 వార్‌థగ్ ఫైటర్ జెట్‌ను కూడా ఇరాన్ కూల్చేసింది.

ఇరాన్ కూల్చిన ఈ విమాన శకలాలు కువైట్‌లో పడినా, ఆ పైలట్ సురక్షితంగా బయటపడ్డాడు. మొదటి యుద్ధ విమానంలో గల్లంతైన పైలట్‌ను రక్షించడానికి రెండు బ్లాక్‌హాక్ హెలికాప్టర్లు గాలింపు చేపట్టాయి.
వీటిపైనా ఇరాన్ దాడి చేసింది, అయితే వీటిని తప్పించుకుని సురక్షితంగా గగనతలం నుంచి బయటకు తీసుకువచ్చారు. ఏ-10 యుద్ధ విమానం కూలిన దృశ్యాలను ముంబైలోని ఇరాన్ కాన్సులేట్ జనరల్ సోషల్ మీడియాలో పోస్ట్ చేసింది. ఈ ఘటనలపై అమెరికా అధ్యక్షుడు ట్రంప్ స్పందిస్తూ ఇలాంటి సంఘటనలు దౌత్య చర్చలపై ప్రభావం చూపవు. ఇది యుద్ధం, మేం యుద్ధంలోనే ఉన్నామన్నారు.