ఆర్టీసీ మ‌రో బాదుడు

తెలంగాణ ఆర్టీసీ వ‌రుస‌గా చార్జీలు పెంచుతూ పోతోంది. అది కూడా ప్ర‌యాణీల‌కు తెలియ‌కుండా పెంచుతోంది. దీంతో వారు ల‌బోదిబోమంటున్నారు. తాజాగా ప్యాసింజ‌ర్ సెస్ పేరిట రూ. 5 నుంచి రూ. 10 వ‌ర‌కు అద‌నంగా వ‌సూలు చేసేందుకు సిద్ధ‌మ‌య్యింది. ఆదివారం నుంచే ఈ పెంపు ప్రారంభం అయ్యింది. ఎక్స్‌ప్రెస్‌, డీలక్స్‌ బస్సుల్లో రూ.5 చొప్పున పెంచాలని, సూపర్‌ లగ్జరీ, రాజధాని, గరుడ, గరుడ ప్లస్‌ బస్సుల్లో చిల్లర సమస్య రాకుండా రూ.10 వరకు రౌండప్‌ చేయాలని ఆర్టీసీ ఎండీ సజ్జనార్‌ సర్య్కులర్‌ జారీ చేశారు. ఇటీవలే రౌండప్‌ పేరిట రూ.5 వరకు చార్జీలను సవరించిన ఆర్టీసీ.. తాజాగా ప్యాసింజర్‌ సెస్‌ పేరిట రూ.5 నుంచి రూ.10 వరకు భారం మోపడం గమనార్హం.

బస్ పాస్ చార్జీలు..
ఇటు హైదరాబాద్ సిటీ బస్సుల్లో బస్‌పాస్‌ చార్జీలను పెంచుతూ కొద్దిరోజుల కిందే ఆర్టీసీ నిర్ణయం తీసుకుంది. ఈ ధరలు ఏప్రిల్‌ ఒకటి నుంచి అమల్లోకి రానున్నాయి. జనరల్‌ బస్‌ టికెట్‌ పాసుల కేటగిరీలో ఆర్డినరీ పాస్‌ చార్జీ రూ.950 నుంచి రూ.1,150కి, మెట్రో ఎక్స్‌ప్రెస్‌ రూ.1,070 నుంచి రూ.1,300కు, మెట్రో డీలక్స్‌ రూ.1,185 నుంచి రూ.1,450కి, మెట్రో లగ్జరీ రూ.2 వేల నుంచి రూ.2,400కు, మెట్రో ఎక్స్‌ప్రెస్‌ రూ.450 నుంచి రూ.550కి, మెట్రో డీలక్స్‌ రూ.575 నుంచి రూ.700కు, ఎంఎంటీఎస్‌–ఆర్టీసీ కోంబో టికెట్‌ చార్జీ రూ.1,090 నుంచి రూ.1,350కి పెరిగింది.

మళ్లీ పెంపు తప్పదు..
మరోవైపు 2 నెలల్లో సుమారు 4,250 బస్సుల్లో వెహికిల్‌ ట్రాకింగ్‌ సిస్టమ్‌ ప్రవేశపెట్టాలని టీఎస్ఆర్టీసీ భావిస్తోంది. ఇది అమల్లోకి వచ్చాక ఇన్ఫర్మేషన్‌ సెస్‌ పేరిట ఒక్కో టికెట్‌పై రూ.1 నుంచి రూ.5 వరకు చార్జీలు పెరిగే అవకాశం ఉన్నట్టు ఆర్టీసీ వర్గాలు తెలిపాయి. ఇప్పటికే చార్జీలు సవరించినప్పటికీ రోజు వారీ ఆదాయం సరాసరిన రూ.10 కోట్ల నుంచి రూ.12 కోట్లు దాటడం లేదని.. డీజిల్‌, ఇతర అవసరాలకు రోజూ రూ.16 కోట్లు ఖర్చు పెట్టాల్సి వస్తోందని ఆర్టీసీ వర్గాలు వాపోతున్నాయి. దీంతో ప్ర‌యాణీకుల‌కు మ‌రోమారు పెంపు త‌ప్ప‌ద‌న్న‌మాటే..