పబ్‌పై దాడి.. రాహుల్ సిప్లిగంజ్ సహా 150 మంది అరెస్ట్
బంజారాహిల్స్‌లోని రాడిసన్ బ్లూ హోటల్‌ పై టాస్క్ ఫోర్స్ అధికారులు ఒక్క సారిగా దాడులు చేశారు. ఈ నేపథ్యంలోనే అక్కడ జరుగుతున్న పార్టీని భగ్నం చేసి సింగర్ రాహుల్ సిప్లిగంజ్‌తో పాటు 150 మందిని అరెస్ట్ చేశారు.
ఇటీవల కాలంలో హైదరాబాద్‌లో భారీగా డ్రగ్స్ కార్యకలాపాలు వెలుగులోకి వస్తుండటంతో పోలీసులు నిఘా పెంచారు. ఈ క్రమంలోనే హైదరాబాద్‌లో ఓ పెద్ద పార్టీని భగ్నం చేశారు. బంజారాహిల్స్‌లోని రాడిసన్ బ్లూ పబ్‌లో ఆదివారం తెల్లవారుజామున 3 గంటల సమయంలో టాస్క్ ఫోర్స్ పోలీసులు దాడులు చేసి యజమానితో సహా 150 మందిని అదుపులోకి తీసుకున్నారు. వీరిలో బిగ్‌బాస్ విన్నర్, టాలీవుడ్ ప్రముఖ సింగర్ రాహుల్ సిప్లిగంజ్ కూడా ఉండటంతో ఈ వ్యవహారం హాట్‌టాపిక్‌గా మారింది. పబ్‌లో నిర్వహించిన పార్టీలో వీరంతా డ్రగ్స్ వాడినట్లుగా అనుమానాలు వ్య‌క్తం అవుతున్నాయి. ఈ పార్టీలో అనేక మంది యువతులు కూడా పాల్గొన్నారు.
అరెస్ట్ చేసిన వారందరినీ బంజారాహిల్స్ పోలీస్‌స్టేషన్‌కు తరలించారు. నిబంధనలకు విరుద్ధంగా తెల్లవారుజామున 3 గంటల వరకు పబ్ నిర్వహించడంతోనే వారిని అదుపులోకి తీసుకున్నారని పైకి చెబుతున్నా… డ్రగ్స్ కోణం ఉందన్న ఆరోపణలు వస్తున్నాయి. విచారణ అనంతరం కొందరిని విడిచిపెట్టగా ప్రస్తుతంగా పోలీసులు అదుపులో 38 మంది ఉన్నట్లు తెలుస్తోంది. అయితే తమను అకారణంగా అరెస్ట్ చేశారంటూ పలువురు పోలీసులతో వాగ్వాదానికి దిగినట్లు తెలుస్తోంది.
నగరంలో డ్రగ్స్ కల్చర్ విపరీతంగా పెరిగిపోతున్న నేపథ్యంలోనే పోలీసులపై ఒత్తిడి తీవ్రంగా పెరిగిపోతోంది. ఎన్ని కట్టుదిట్టమైన చర్యలు తీసుకుంటున్నా ఏదొక రూపంలో నగరంలోకి డ్రగ్స్ సరఫరా అవుతూనే ఉంది. ముఖ్యంగా ఐటీ ఉద్యోగులే టార్గెట్‌గా డ్రగ్స్ దందా భారీగా కొనసాగుతోంది. వీకెండ్ పార్టీల పేరుతో ఐటీ ఉద్యోగులు, బడాబాబుల పిల్లలు డ్రగ్స్ వినియోగించడం ఫ్యాషన్‌గా మారిపోయింది. ఇటీవల డ్రగ్స్‌కు బానిసైన ఓ బీటెక్ విద్యార్థి చివరికి ప్రాణాలు కోల్పోవడంతో తెలంగాణ ప్రజలు ఉలిక్కిపడ్డాయి. రాష్ట్రంలోనే తొలి డ్రగ్స్ మరణంగా రికార్డైన ఈ కేసును పోలీసులు ప్రతిష్ఠాత్మకంగా తీసుకున్నారు. ఈ వ్యవహారంలోనే పోలీసు అధికారి కొడుకుగా భావిస్తున్న లక్ష్మీపతి అనే యువకుడు కీలక సూత్రధారిగా ఉన్నట్లు పోలీసులు గుర్తించారు. అతడు పరారీలో ఉండటంతో తెలుగు రాష్ట్రాలతో పాటు గోవాలోనూ గాలిస్తున్నారు.