మహారాష్ట్రకు మరోసారి కేసీఆర్..
తెలంగాణ ముఖ్యమంత్రి కేసీఆర్ మరోసారి మహారాష్ట్రలో పర్యటించనున్నారు. కుటుంబ సమేతంగా ఆయన నేడు కొల్హాపూర్ వెళ్లనున్నారు.. దేశంలోని శక్తి పీఠాల్లో ఒకటైన మహాలక్ష్మి అమ్మవారిని సీఎం దంపతులు దర్శించుకోనున్నారు. ఉదయం10:30 గంటలకు హైదరాబాద్ నుంచి ప్రత్యేక విమానంలో సీఎం కేసీఆర్, ఆయన కుటుంబ సభ్యులు బయల్దేరనున్నారు. మహాలక్ష్మి అమ్మ వారికి ప్రత్యేక పూజలు చేయనున్నారు. దర్శనం అనంతరం సాయంత్రం హైదరాబాద్ తిరుగు పయనం కానున్నారు. లక్ష్మీదేవికి ప్రత్యేకించి ఉన్న ఆలయాల్లో కొల్హాపూర్ ఆలయం ప్రముఖమైంది. అమ్మవారి అష్టాదశ శక్తి పీఠాల్లో ఏడోదిగా చెప్పుకునే ఈ ఆలయాన్ని ప్రతి ఏటా లక్షలాది మంది భక్తులు దర్శిస్తుంటారు.
ముఖ్యమంత్రి ఉద్ధవ్ ఠాక్రే పిలుపు మేరకు గత నెల 20వ తేదీన కూడా సీఎం కేసీఆర్ మహారాష్ట్రకు వెళ్లారు. బీజేపీ, కాంగ్రెస్‌యేతర కూటమి ఏర్పాటు దిశగా ఉద్ధవ్ ఠాక్రే, ఎన్సీపీ చీఫ్ శరద్ పవార్ తదితరులతో చర్చలు కూడా జరిపారు. ఈ పర్యటనలో కేసీఆర్‌తో పాటు పార్టీ ఎంపీలు, ఆయన కూతురు ఎమ్మెల్సీ కవిత కూడా పాల్గొన్నారు..