రెండున్నర గంటలు – 50 ప్రశ్నలు
సంధ్య థియేటర్ తొక్కిసలాట కేసులో అల్లు అర్జున్ (Allu Arjun) విచారణ ముగిసింది. దాదాపు రెండున్నర గంటలపాటు సాగిన ఈ విచారణలో 50కి పైగా ప్రశ్నలు అడిగినట్లు సమాచారం. ఇందులో కొన్నింటికి ఆయన సమాధానం ఇవ్వకుండా మౌనం వహించినట్లు సమాచారం.
పుష్ప-2 ప్రీమియర్ షో సమయంలో సంధ్య థియేటర్ దగ్గర జరిగిన తొక్కిసలాట ఘటనపై అల్లు అర్జున్ ను చిక్కడపల్లి పోలీస్స్టేషన్లో అధికారుల సమక్షంలో విచారించారు. సెంట్రల్ జోన్ డీసీపీ ఆకాంక్ష్ యాదవ్, ఏసీపీ రమేశ్, ఇన్ స్పెక్టర్ రాజునాయక్ అల్లు అర్జున్ను విచారించిన వారిలో ఉన్నారు. న్యాయవాదులతో కలిసి అల్లు అర్జున్ విచారణకు హాజరయ్యారు. విచారణ సందర్భంగా పుష్పరాజ్పై ప్రశ్నల వర్షం కురిపించినట్లు తెలిసింది. తొక్కిసలాటలో రేవతి చనిపోయిన విషయం థియేటర్లో ఉన్నప్పుడు మీకు తెలియదా..? మీడియా ముందు ఎవరూ చెప్పలేదని ఎందుకు చెప్పారు..? రోడ్ షోకు అనుమతి తీసుకున్నారా..? లేదా..? అనుమతి లేకుండా రోడ్ షో ఎలా నిర్వహించారు..? రోడ్ షోకు పోలీసులు అనుమతి ఇచ్చారని మీకు ఎవరు చెప్పారు..? వంటి ప్రశ్నలు అడిగినట్లు సమాచారం.
విచారణలో అల్లు అర్జున్ వాంగ్మూలాన్ని పోలీసులు రికార్డు చేశారు. మొత్తం విచారణను వీడియో రికార్డింగ్ చేశారు. విచారణ సందర్భంగా పుష్పరాజ్ నుంచి కీలక సమాచారాన్ని రాబట్టినట్లు తెలిసింది. కాగా, సంధ్య థియేటర్ తొక్కిసలాట కేసులో హైకోర్టు మధ్యంతర బెయిల్పై ఉన్న సినీనటుడు అల్లు అర్జున్కు పోలీసులు నోటీసులు ఇచ్చిన విషయం తెలిసిందే. విచారణకు హాజరు కావాలని చిక్కడపల్లి పోలీసులు సోమవారం నోటీస్ ఇచ్చారు. మంగళవారం ఉదయం 11 గంటలకు పీఎస్కు రావాలని నోటీసుల్లో పేర్కొన్నారు. పోలీసుల నోటీసులకు స్పందించిన బన్ని.. ఇవాళ పీఎస్లో విచారణకు హాజరయ్యారు. తన తండ్రి అల్లు అరవిరంద్, మామ చంద్రశేఖర్ పీఎస్కు వెళ్లారు.
అయితే చాలా ప్రశ్నలకు ఆయన మౌనంగా ఉన్నట్లు తెలుస్తోంది. ముఖ్యంగా తొక్కిసలాటలో రేవతి చనిపోయిన విషయం మీకు అప్పుడే తెలుసు కదా అని పోలీసులు ప్రశ్నించారట. అలానే తర్వాతి రోజు వరకూ రేవతి మృతి గురించి మీకు తెలియదని మీడియాకి ఎందుకు చెప్పారంటూ ప్రశ్నించినట్లు తెలుస్తోంది. ఇలా కొన్ని ప్రశ్నలకు అల్లు అర్జున్ మౌనంగా ఉన్నట్లు సమాచారం. రాత్రి 9.30 గంటల నుంచి సంధ్య థియేటర్ నుంచి మీరు వెళ్లేవరకూ ఏం జరిగిందో వివరంగా చెప్పాలంటూ అడిగినట్లు తెలుస్తోంది. డీసీపీ సెంట్రల్ జోన్ నేతృత్వంలోని బృందం.. దాదాపు రెండున్నర గంటల పాటు విచారించింది. ఇక తొక్కిసలాట జరిగిన 10 నిమిషాల వీడియోని కూడా పోలీసులు బన్నీకి చూపించి ప్రశ్నలు అడిగారు. విచారణ పూర్తి కావడంతో కట్టు దిట్టమైన భద్రత మధ్య అల్లు అర్జున్ని ఇంటికి తీసుకువెళ్లేందుకు పోలీసులు ఏర్పాట్లు చేస్తున్నారు.