రైతులు అరిగోస పడుతున్నరు..
ప్రధాని మోదీకి సీఎం కేసీఆర్ లేఖ - రైతు వ్యతిరేక నిర్ణయాలు మార్చుకోండి - కోట్లాది మంది రైతుల తరఫున విన్నవిస్తున్నానని వెల్లడి
దేశంలో రైతులు అరిగోస పడుతున్నారని ముఖ్యమంత్రి కేసీఆర్ ఆవేదన వ్యక్తం చేశారు. ప్రధాని నరేంద్ర మోదీకి కేసీఆర్ బుధవారం బహిరంగ లేఖ రాశారు. ఎరువుల ధరల పెంపు నేపథ్యంలో కేంద్రంపై ముఖ్యమంత్రి కేసీఆర్ నిరసన వ్యక్తం చేశారు. పెరిగిన ఎరువుల ధరలు తగ్గించాలని, కోట్లాది మంది రైతుల తరఫున విన్నవిస్తున్నానని లేఖలో పేర్కొన్నారు.
2022 వరకు రైతుల ఆదాయం రెట్టింపు చేస్తామని 2016లో ప్రకటించారని.. ఇంతవరకు పట్టించుకోలేదని కేసీఆర్ విమర్శించారు. దేశ రైతాంగం ఇప్పటికే తీవ్ర నష్టాల్లో ఉందని పేర్కొన్నారు. ‘ఎరువుల ధరలు 50 నుంచి 100 శాతం పెరిగాయి. గత 90 రోజులుగా ఎరువుల ధరలు విపరీతంగా పెరుగుతున్నాయి. ఇప్పటికే అనేక రైతు వ్యతిరేక నిర్ణయాలు తీసుకున్నారు. వ్యవసాయాన్ని కార్పొరేట్ శక్తులకు కట్టబెట్టేందుకు కుట్రలు చేస్తున్నార’ని ఆరోపణలు గుప్పించారు.
ఐదేండ్లలో రైతుల పెట్టుబడి రెట్టింపు అయిందన్నారు. ‘యూరియా, డీఏపీ వినియోగం తగ్గించాలని రాష్ట్రాలకు చెబుతున్నారు. ఎరువుల ధరలు తగ్గించకపోగా, ఆ భారాన్ని రైతులపై నెడుతున్నారు. దేశంలోని కోట్లాది రైతుల పక్షాన చెబుతున్నా ఎరువులు సబ్సిడీపై ఇవ్వాలి. రైతుల పెట్టుబడి మొత్తాన్ని తగ్గించాల్సిన అవసరం ఉందన్నారు. కేంద్రం చర్యలతో రైతులు ఆందోళన చెందుతున్నారు. ఎరువుల సబ్సిడీ విధానాన్ని రైతుల ప్రయోజనాలకు విరుద్ధంగా మార్చారు. 70 ఏళ్లుగా ఎరువులపై సబ్సిడీ కొనసాగుతోంది. నరేగాతో వ్యవసాయాన్ని అనుసంధానం చేయాలని తెలంగాణ తీర్మానం చేసి పంపింది. అయినా కేంద్రం నుంచి ఎలాంటి స్పందన లేదు..’ అని కేసీఆర్ పేర్కొన్నారు.
కరెంటు మోటార్లు బిగించి బిల్లులు వసూలు చేయడం సరికాదని ముఖ్యమంత్రి అన్నారు. ఎన్ఆర్జీఈని వ్యవసాయానికి అనుసంధానం చేయమంటే చేయకుండా నాన్చుతున్నారని ఆరోపించారు. విపరీతంగా ఎరువుల ధరలు పెంచడం, రైతులు తాము పండించిన ధాన్యాన్ని కూడా కొనకుండా దుర్మార్గపు చర్యలకు పూనుకోవడం వెనక భారీ కుట్ర దాగి ఉందన్నారు.. రైతులను వారి పొలాల్లో వారినే కూలీలుగా మార్చే కుట్రలను ఎదుర్కోవాలని రైతాంగానికి పిలుపునిచ్చారు. గ్రామీణ వ్యవసాయ రంగాన్ని, అనుబంధ వృత్తులను నిర్వీర్యం చేసి, గ్రామీణ ఆర్థిక రంగాన్ని చిన్నాభిన్నం చేసి వ్యవసాయాన్ని కార్పొరేట్ శక్తులకు కట్టబెట్టేందుకు కుట్రలు పన్నుతున్న బీజేపీని కూకటివేళ్లతో పెకలించి వేయాలని దేశ ప్రజలకు, రాష్ట్ర ప్రజలకు సీఎం కేసీఆర్ పిలుపునిచ్చారు..
దశాబ్దాలుగా కొనసాగుతున్న ఎరువుల సబ్సిడీలను ఎత్తివేసి రైతులను వ్యవసాయం చేయకుండా చేస్తున్న బీజేపీ కేంద్ర ప్రభుత్వంపై దేశ రైతాంగం నాగండ్లు ఎత్తి తిరగబడితే తప్ప వ్యవసాయాన్ని కాపాడుకోలేని పరిస్థితులు దాపురించాయని సీఎం ఆవేదన వ్యక్తం చేశారు. బీజేపీ కేంద్రానికి బుద్ధి వచ్చేదాకా ఎక్కడికక్కడ నిలదీయాలని ప్రజలకు సీఎం పిలుపునిచ్చారు. కేంద్రం తక్షణమే పెంచిన ఎరువుల ధరలను తగ్గించకపోతే దేశవ్యాప్తంగా, రాష్ట్రవ్యాప్తంగా ఆందోళన చేపట్టి కేంద్ర ప్రభుత్వం మెడలు వంచుతామని స్పష్టం చేశారు. కేంద్రం కుట్రలను రాష్ట్ర రైతాంగం అర్థం చేసుకుని బీజేపీ ప్రభుత్వంపై ధరలు తగ్గించే దాకా సాగే పోరాటంలో కలిసిరావాలని పిలుపునిచ్చారు.