హోదా మరిచిన స్నేహం…
Minister Seethakka:రాజకీయాల్లో ఫైర్ బ్రాండ్గా, ప్రజల మనిషిగా పేరు తెచ్చుకున్న రాష్ట్ర మంత్రి సీతక్క పదవులు, హోదాలను పక్కన పెట్టి.. తన చిన్ననాటి స్నేహితులతో కలిసి పాత జ్ఞాపకాలను నెమరువేసుకున్నారు. మేడారం పర్యటనలో భాగంగా తన పాఠశాల నాటి మిత్రులను కలుసుకున్న ఆమె, కాసేపు సరదాగా ముచ్చటించి పాత జ్ఞాపకాలను నెమరువేసుకున్నారు.
గుర్తుకొచ్చిన పాఠశాల రోజులు
ములుగు బాలికల పాఠశాల, అలాగే స్థానిక హాస్టల్లో సీతక్కతో కలిసి చదువుకున్న స్నేహితులందరూ మేడారంలో ఒక్కచోట చేరారు. తమ మధ్య ఉన్నది మంత్రి-సామాన్యుల బంధం కాదు, కేవలం ‘స్నేహం’ మాత్రమేనని చాటుతూ అందరూ కలిసి ఉత్సాహంగా గడిపారు. చదువుకునే రోజుల్లో పడ్డ కష్టాలు, అల్లరి పనులు, పంచుకున్న అనుభవాలను గుర్తు చేసుకుంటూ వాతావరణాన్ని సందడిగా మార్చేశారు.
సోషల్ మీడియాలో వైరల్గా ‘సెల్ఫీ’లు
మేడారంలోని సెల్ఫీ పాయింట్ల వద్ద మంత్రి సీతక్క తన స్నేహితురాళ్లతో కలిసి ఫోటోలు దిగారు. సామాన్య మహిళలా స్నేహితుల మధ్య కూర్చుని ఆమె నవ్వుతూ దిగిన ఫోటోలు ప్రస్తుతం సోషల్ మీడియాలో విపరీతంగా వైరల్ అవుతున్నాయి. నెటిజన్లు ఆమె నిరాడంబరతను చూసి “పదవి ఏదైనా.. పాత స్నేహం మారదు” అంటూ ప్రశంసల జల్లు కురిపిస్తున్నారు.
“జీవితంలో ఎన్ని ఉన్నత శిఖరాలను అధిరోహించినా, చిన్ననాటి స్నేహానికి ఉండే విలువ మరువలేనిది. స్నేహితులతో గడిపిన ఈ సమయం నాకు ఎంతో మానసిక ప్రశాంతతను, ఉత్సాహాన్ని ఇచ్చింది.” — మంత్రి సీతక్క