తెలంగాణలో మరో 4.5 లక్షల మందికి పింఛన్లు
తెలంగాణలోని నిరుపేద కుటుంబాలకు కాంగ్రెస్ ప్రభుత్వం దీపావళి పండుగ కానుకగా తీపి కబురు అందించింది. ప్రజా ప్రభుత్వ సంక్షేమ పథకాల్లో భాగంగా రాష్ట్రవ్యాప్తంగా అర్హులైన మరో 4.5 లక్షల మంది కొత్త లబ్ధిదారులకు ‘చేయూత’ పింఛన్లను అంద‌చేయ‌నున్నారు. ఈ విష‌యాన్ని పంచాయతీ రాజ్, గ్రామీణాభివృద్ధి శాఖ మంత్రి సీతక్క వెల్లడించారు. ఈ బృహత్తర పింఛన్ల పంపిణీ కార్యక్రమానికి నవంబర్ 8న వికారాబాద్ జిల్లా కోడంగల్ లో శ్రీకారం చుట్టనున్నారు. ముఖ్యమంత్రి రేవంత్ రెడ్డి స్వయంగా హాజరై, మంత్రి సీతక్కతో కలిసి లబ్ధిదారులకు నూతన పింఛన్ మంజూరు పత్రాలను అందజేసి ఈ కార్యక్రమాన్ని ప్రారంభించనున్నారు.
కోడంగల్‌లో సీఎం చేతుల మీదుగా ప్రారంభం
కొత్త పింఛన్ల పంపిణీ కార్యక్రమానికి ముఖ్యమంత్రి రేవంత్ రెడ్డి ఆదివారం శ్రీకారం చుట్టనున్నారు. తన సొంత నియోజకవర్గమైన కొడంగల్‌లో నిర్వహించనున్న ప్రత్యేక కార్యక్రమంలో నూతన పింఛన్ లబ్ధిదారులకు మంజూరు పత్రాలను అంద‌చేస్తారు. ఈ కార్యక్రమంలో పంచాయతీరాజ్, గ్రామీణాభివృద్ధి, మహిళా శిశు సంక్షేమ శాఖల మంత్రి డా. దనసరి అనసూయ సీతక్క పాల్గొననున్నారు. ముఖ్యమంత్రి చేతుల మీదుగా నూతన లబ్ధిదారులకు పింఛన్ మంజూరు పత్రాలను అందజేసి అధికారికంగా పంపిణీ కార్యక్రమాన్ని ప్రారంభించనున్నారు. అనంతరం ఇదే కార్యక్రమాన్ని రాష్ట్రవ్యాప్తంగా నిర్వ‌హిస్తారు.
అన్ని జిల్లాల్లో మంజూరు పత్రాల పంపిణీ
కొడంగల్‌లో ప్రారంభమయ్యే కార్యక్రమం అనంతరం రాష్ట్రంలోని అన్ని జిల్లాల్లో కొత్త పింఛన్ల మంజూరు పత్రాలను పంపిణీ చేయనున్నారు. ఆయా జిల్లాల్లో మంత్రులు, ప్రజాప్రతినిధులు, సంబంధిత అధికారుల చేతుల మీదుగా అర్హులైన లబ్ధిదారులకు పత్రాలు అందజేయనున్నారు. ఇందుకు అవసరమైన ఏర్పాట్లు చేపట్టనున్నారు. భర్తను కోల్పోయి ఆర్థిక ఇబ్బందులు ఎదుర్కొంటున్న వితంతువులు, కుటుంబ పోషణకు ఇబ్బందులు పడుతున్న ఒంటరి మహిళలు, జీవనోపాధి కోసం ఇతరులపై ఆధారపడాల్సి వస్తున్న దివ్యాంగులకు ఈ పింఛన్లు కొంత ఆర్థిక వెసులుబాటు కల్పించనున్నాయి. అలాగే సంప్రదాయ వృత్తులపై ఆధారపడి జీవిస్తున్న నేత కార్మికులు, గీత కార్మికులకు కూడా ప్రభుత్వం చేయూత అందించనుంది.
ఈ నెల నుంచే పింఛన్ల చెల్లింపులు
కొత్తగా పింఛన్లు మంజూరైన లబ్ధిదారులకు మరో కీలక శుభవార్త కూడా ఉంది. కేవలం మంజూరు పత్రాల పంపిణీకే పరిమితం కాకుండా, ఈ నెల నుంచే నూతన లబ్ధిదారుల ఖాతాలకు పింఛన్ మొత్తాన్ని చెల్లించనున్నారు. దీంతో దీర్ఘకాలంగా పింఛన్ల కోసం ఎదురుచూస్తున్న అర్హులకు త్వరలోనే ఆర్థిక సహాయం అందనుంది. మొత్తంగా దీపావళి పండుగ సందర్భంగా ప్రభుత్వం తీసుకున్న ఈ నిర్ణయంతో రాష్ట్రవ్యాప్తంగా మరో 4.5 లక్షల మందికి సామాజిక భద్రత కల్పించే దిశగా అడుగులు పడనున్నాయి. ముఖ్యంగా ఆర్థికంగా వెనుకబడిన, జీవనోపాధి కోసం ఇబ్బందులు ఎదుర్కొంటున్న కుటుంబాలకు చేయూత పింఛన్లు కొంతమేర అండగా నిలవనున్నాయి.