సీఎం రేవంత్ రెడ్డికి వినూత్న రీతిలో జన్మదిన శుభాకాంక్షలు

తెలంగాణ ముఖ్యమంత్రి రేవంత్ రెడ్డి పుట్టినరోజును పురస్కరించుకుని కాంగ్రెస్ శ్రేణులు వినూత్న రీతిలో తమ అభిమానాన్ని చాటుకుంటున్నాయి. కాంగ్రెస్ నేత మెట్టు సాయికుమార్ సీఎం రేవంత్ రెడ్డికి ఓ ప్రత్యేకమైన బహుమతితో జన్మదిన శుభాకాంక్షలు తెలిపారు. ప్రభుత్వం చేసిన ‘రైతు రుణమాఫీ’కి కృతజ్ఞతగా… పచ్చని పొలంలో రైతుల చేత వరినారుతో సీఎం చిత్రపటాన్ని ఆవిష్కరించారు.

ఈ రోజు ముఖ్యమంత్రి రేవంత్ రెడ్డి పుట్టినరోజు సందర్భంగా రాష్ట్రవ్యాప్తంగా సంబరాలు అంబరాన్ని అంటుతున్నాయి. ఈ క్రమంలో కాంగ్రెస్ నేత మెట్టు సాయికుమార్ ముఖ్యమంత్రిపై తనకున్న ప్రగాఢ అభిమానాన్ని ఎంతో సృజనాత్మకంగా వ్యక్తం చేశారు. రాష్ట్ర ప్రభుత్వం ఇటీవలే అన్నదాతల కోసం ప్రతిష్టాత్మకంగా అమలు చేసిన ‘రైతు రుణమాఫీ’కి హర్షం వ్యక్తం చేస్తూ రైతుల పక్షాన ఈ వినూత్న కార్యక్రమానికి శ్రీకారం చుట్టారు.

రైతుల భాగస్వామ్యంతో ఏకంగా పొలంలోనే వరి నాట్లతో సీఎం రేవంత్ రెడ్డి రూపాన్ని తీర్చిదిద్దారు. వరి నారుతో సీఎం చిత్రాన్ని రూపొందించేందుకు రైతులు దాదాపు 20 రోజుల పాటు ఎంతో శ్రమించారు. పచ్చని పొలంలో అచ్చం ముఖ్యమంత్రిని తలపించేలా ఉన్న ఈ వరినారు చిత్రం ఇప్పుడు అందరినీ విశేషంగా ఆకట్టుకుంటోంది. రైతుల పట్ల సీఎం రేవంత్ రెడ్డి చూపుతున్న చిత్తశుద్ధికి, అన్నదాతలకు ఆయనపై ఉన్న ప్రత్యేక అభిమానానికి ఈ వినూత్న చిత్రపటమే నిదర్శనమని కాంగ్రెస్ నేత మెట్టు సాయికుమార్ పేర్కొన్నారు. ఈ అరుదైన, ఆకర్షణీయమైన బహుమతి ద్వారా సీఎం రేవంత్ రెడ్డికి ఆయన ప్రత్యేక జన్మదిన శుభాకాంక్షలు తెలిపారు.