కేసీఆర్ ఎప్పుడైనా జైలుకు వెళ్లొచ్చు..
రాష్ట్రంలో కేసీఆర్ భారీగా అవినీతికి పాల్పడ్డారు. దీన్ని కేంద్రం సీరియస్‌గా తీసుకుంటోంది. చర్యలకు సిద్ధమవుతోంది. సీఎం ఎప్పుడైనా జైలుకు వెళ్లొచ్చని భార‌తీయ జ‌న‌తా పార్టీ చీఫ్ బండి సంజయ్ వెల్ల‌డించారు. స్వామి వివేకానంద జయంతి పురస్కరించుకుని బీజేపీ యువ మోర్చా ఆధ్వర్యంలో ఏర్పాటు చేసిన ఉచిత వైద్య శిబిరాన్ని సంజయ్ బుధవారం ప్రారంభించారు. అనంతరం ఆయన మీడియాతో మాట్లాడారు. తాను జైలుకు వెళ్తా అనే విష‌యం కేసీఆర్‌‌కు కూడా తెలిసి పోయిందన్నారు. అందుకే కమ్యూనిస్టులతోనూ, ఇతర పార్టీల నేతలతో భేటీ అవుతున్నాడని అన్నారు. ఆర్జేడీ నేత తేజస్వీ యాదవ్ తండ్రి లాలూ ప్రసాద్ యాదవ్ కూడా పశుగ్రాసం కుంభకోణం కేసులో జైలుకు వెళ్లి వచ్చాడని, కేసీఆర్ కూడా జైలుకు వెళ్తే ఎలా ఉంటుందో.. తేజస్వీ యాదవ్ నిన్న ప్రగతి భవన్‌కు వచ్చి వివరించి ఉంటాడని ఎద్దేవా చేశారు. కేంద్రం జైలుకు పంపుతుందనే కమ్యూనిస్టులు, విపక్ష నేతలు కేసీఆర్‌ను పరామర్శించేందుకు రాష్ట్రానికి వస్తున్నారని సంజయ్ అన్నారు.. కేంద్ర ప్రభుత్వం జైలుకు పంపితే సానుభూతి కోసం కేసీఆర్ ప్రయత్నాలు చేస్తున్నాడని ఆరోపించారు. ఫ్రంట్ లేదు టెంట్ లేదు.. దోచుకోవడం దాచుకోవడమే కేసీఆర్ పనంటూ ఫైర్ అయ్యారు. కేసీఆర్‌ను ఎక్కడున్నా గుంజుకొచ్చుడే.. జైల్లో వేసుడేనని వ్యాఖ్యానించారు. 317 జీవో సవరించాలని బీజేపీ చేస్తున్న పోరాటాన్ని డైవర్ట్ చేసే ప్రయత్నాలు కూడా కేసీఆర్ చేస్తున్నారని సంజయ్ ఆగ్రహం వ్యక్తం చేశారు.